About Last Night..

بعد عشاء خفيف (هم تعشوا عشا خفيف.. وأنا ضربت السيفود باستا بالخمس) مع مجموعة من الصديقات توجهنا أنا، وأختي، وبنت خالتي إلى العديلية بغرض توزيع المنشور (1 ، 2) المتضمن على فتوى السيستاني والطبطبائي حول شراء وبيع الأصوات

.
كان هدفنا الأول هو المقر الانتخابي لأحد المرشحين ممن عرف عنهم شراء الأصوات منذ الانتخابات الماضية

.

وصلنا المقر النسائي متأخرين، فقد انتهى المرشح من إلقاء كلمة أمام الناخبات وكان في طريقه إلى مقر الرجال الذي يبعد خطوات عن مقر النساء
نزلنا وبدأنا بتوزيع المنشور على السيدات المتواجدات حول المقر.. ولأن المقر عبارة عن منزل لم يكن من اللائق اقتحامه لتوزيع فتاوى دينية، فقد اكتفينا بوضع المنشورات على السيارات أو تسليمها يدا بيد للأخوات في طريقهن إلى السيارات
بقيت إحدانا (بنت خالتي) بجوار مقر السيدات، بينما صعدت إلى السيارة مع أختي وبدأنا بتوزيع ما لدينا على الرجال من المارة. منهم من رحب وشجع، ومنهم من "طقته البوهة"، استدرنا بسيارتنا للعودة إلى المقر النسائي حيث تنتظرنا ثالثتنا، وحال صعودها السيارة، قررنا أن نوزع المزيد من المنشورات وناخذ لفة أخيرة على الشارع حيث يقع المقر

.

في تلك اللحظات رن تلفوني، وكانت الزميلة البلوغرية اللي ساعدتنا في التوزيع، فقالت لي ان أحد المنظمين أبدى لها احتجاجه على توزيعها للمنشورات بجانب مقرهم

.
ما أن بدأنا التحرك حتى أوقفنا شاب جميل المحيا دقيق الملامح ، علقت على رقبته بطاقة تشير إلى أنه أحد منظمي الندوة أو الحملة، وطلب منا إيقاف السيارة لأنه يريد التحدث معنا
أوقفنا السيارة في إحدى الزوايا، وانتظرنا الشاب.. وما هي إلا دقيقة حتى كان هو، ومعه رجل أربعيني عريض المنكبين شلولخ، فدار الحوار التالي عبر شباك السائقة/أختي

.

عريض المنكبين: انتو شقاعد تسوون وبأي حق قاعدين توزعون هالأوراق.. ترى آنا أقدر أوديكم بداهية
آنا: خير اخوي؟ شعندك ضد اللي قاعدين نوزعه
عريض المنكبين(بابتسامته الصفراء): هذا مو قانوني.. آنا مباحث وترى أقدر أؤذيكم
آنا: أي قانون هذا؟ احنا أحرار نوزع اللي نبيه وانت مالك سلطة علينا
عريض: لا مو أحرار.. شتقصدون قاعدين توزعون هالكلام عندنا؟
آنا: عفوا.. انت شاسمك؟
عريض: ليش تبين اسمي؟
آنا: يعني قاعدين نتكلم بدون لا نعرف اسمك.. ليش ما تقولون اساميكم؟ شمنه خايفين؟

الشاب اللطيف وقد أخذته الحمية لاتهامه بالجبن: لا مو خايفين آنا فلان ولد فلان الفلاني -ابن المرشح

آنا: والنعم فيك وفي ابوك.. واللي معاك شاسمه؟

.
صمت مطبق

.
آنا: زين تخلوني أصوركم؟

طلعت تلفوني لالتقاط صورة، فغطوا وجوههم كالصبايا الخجولات

عريض المنكبين: لا لا .. لا تصورين رجاءً
آنا: زين ما أصور.. بس انت شاسمك؟
عريض: شتبين باسمي؟
آنا: نتعرف بس

.
عريض المنكبين ممتنع عن الكلام
.

آنا: الحين ريال طول بعرض وتقول مباحث خايف أصورك وما تبي تعطيني اسمك؟ آنا اسمي شروق عبد المحسن وساكنة بالجابرية - أظن هذي عدوى خالد الفضالة -.. انت شاسمك؟ مو معقولة ريال وخايف تقول اسمك
الشاب اللطيف: لا يبه مو خايف.. اسمه علان الفلاني - نفس اسم العائلة.. ولد عم المرشح
آنا: تشرفنا
الشاب: الحين ليش قاعدين توزعون أوراقكم هني.. شتقصدون؟ وليش ما توزعونها على باجي المقار؟
آنا: لا، لا تخاف.. نوزعها عندكم وعند غيركم
علان عريض المنكبين (وقد علت وجهه نفس الابتسامة الصفراء): انتو من دازكم.. من طرف منو؟ صالح الفضالة؟
الشاب: لا هذيله مو من طرف صالح الفضالة - الواد فتك

أختي: يعني لازم نكون من طرف أحد؟ احنا هني بنوزع هالاوراق ومو يايين من طرف أي أحد
علان عريض المنكبين: لا انتو قاصدين تشوهون سمعة مرشحنا.. والا ليش توزعونها عندنا تحديدا؟
آنا: أولا قلنا لك وزعناها عندك وعند غيرك، بس الغريبة ان انتو بس اللي احتجيتوا عليها مع انها ما فيها إلا فتاوى من شيوخ دين.. ليش متحسسين من الموضوع؟
عريض المنكبين: أي رجال دين.. انتي تعرفينهم ذولي؟
اختي: اي نعرفهم.. هذا محمد الطبطبائي وهذا السيستاني
آنا: مو مقتنع في كلامهم عطني اسم شيخ دين تحترمه وأييب لك منه فتوى
عريض المنكبين: لا يبه آنا مالي شغل بالدين.. آنا ما عندي إلا شيخ واحد
اختي: منو شيخك؟
عريض: شيخي صباح الأحمد
آنا: زين ما عندك دين، وترى احنا بعد محنا متدينين، بس ما عندك أخلاق؟
عريض: إذا مو متدينين شعندكم توزعون هالمنشورات
آنا: والله مستعدين نوزع أي شي يخلي هالانتخابات أنظف
عريض: زين شرايكم بخمسمية دينار وجنطة شانيل؟ ترضيكم؟ تسكتون؟
.
الحين احنا اللي طقتنا البوهة.. اختي اللي قاعدة يمي أشوفها بدت تتنافض.. وبنت خالتي في الكرسي الخلفي كانت مصدومة ورفعت الجامة
.
أختي: انت الحين ما تستحي أشكره تقول انك تشتري أصوات؟
عريض المنكبين ومعه الشاب اللطيف بصوت واحد: اي يبه احنا نشتري أصوات.. شعندكم؟
آنا: واحنا بعد هني وبنوزع اللي عندنا عسى تنظف الديرة من أمثالكم.. شعندكم؟ وبعدين سمعنا ان الصوت بألف مو بخمسمية؟
عريض: لا الصوت بخمسمية. بس ما راح نزعلكم
آنا: زبن سمعنا ان الجناط اللي توزعونها تقليد
وهنا أعلن الشاب الصغير رفضه لاتهامنا بصوته الجهوري قائلا: لا والله، آنا اللي مسافر ويايبهم.. أصليين، الجنطة بثمانمية دينار
عريض: يبه تعالوا عندنا بالمقر باجر الساعة سبع ونص، واحنا نعطيكم اللي يرضيكم
حاولت أسجل الكلام على تلفوني، بس شافوني وامتنعوا عن الكلام.. سجلت مقطع صغير أسألهم فيه عن سعر الصوت مرة ثانية فأنكرا: لا يبه احنا ما قلنا نبيع ولا نشتري

.

..وبعد شوي شفت الشاب الصغير اللي عمره ما تجاوز السبعة عشر عاما يمشي باتجاه شباكي.. نزلت الشباك
الشاب الحليوة: لو سمحتي مسحي التسجيل
آنا: لا ماني ماسحته
الشاب: أقول لك مسحيه.. رجاءً
آنا: ترى ما قلتوا فيه شي يسوى.. وكلكم خقيتوا لما بديت أسجل.. يعني لا تخاف الشريط ما فيه شي عليكم
الشاب: أقول لك مسحيه.. ما نبي تتشوه سمعتنا زيادة
آنا: شفيها سمعتكم؟
الشاب (بتأثر): انتي تدرين.. سمعتنا صايرة بالأرض.. آنا ما أنام بالليل من الكلام اللي أسمعه
آنا: زين ما سألت نفسك ليش سمعتكم بالأرض؟ وليش الناس مو عاجبها اللي قاعد يصير عندكم؟ ترى شفنا وايد بنات طلعوا من مقركم وشجعونا على اللي سويناه ويقولون لنا تبون تفضحون هالمرشح روحوا لمقره بالليل وشوفوا هناك شيعطيكم
الشاب: أدري، يعني آنا ما أدري.. والله أدري
آنا: زين ليش ترضاها على نفسك؟ انت شاب صغير ومثل اخوي.. حرام اللي قاعد تسويه
الشاب: هذا ابوي.. يعني ما أشتغل حق ابوي؟
آنا: اي.. اذا ابوك يسوي شي غلط مو مضطر انت تجاريه
الشاب: انتي من صجك؟؟ يعني أطلع من ظهر ابوي وأقلب عليه
آنا: آنا ما قلت تقلب عليه.. بالعكس آنا أقدر انك تحب ابوك وتبي تساعده.. وبالعكس اللي ما فيه خير في أهله ما فيه خير في الناس
الشاب: زين.. يعني شسوي؟ هذا ابوي
آنا: انت وابوك وأهلك على عيني وراسي.. آنا بعد أحب ابوي، بس ما أوقف معاه إذا غلط.. أكيد هذا ابوك، بس على الأقل لا تشتغل بحملته وبهالطريقة.. خلك معاه لأنك ولده، بس بدون لا تسوي الغلط
الشاب: انتي الحين جاية تعدلين الديرة؟ ترى الديرة كلها خربانة وما تمشي إلا بهالطريقة
آنا: لا والله الديرة ما اختربت إلا من فعايلكم.. واي نعم آنا أبي أعدل اللي أقدر عليه
سكت الولد شوي بعدين قال بنبرة واطية: انتي ما تدرين، آنا كل مرة أخلي فيها وحدة من "الحريم" تحلف عالمصحف تخنقني العبرة

.
هني آنا اللي خنقتني العبرة.. ما أدري إذا هالمرشح يدري شقاعد يسوي بولده.. عمره 17 سنة بس. يا ريت ابوه كان موجود وسامعه
وحسيت ان كلامي ضايقه.. وان احنا ما نختار أهالينا، وانه مجبور انه يجاري ابوه.. هذا غير اني حبيت هالولد.. ملامحه تدش القلب، ومخه نظيف بغض النظر عن بعض الكلام اللي قاله
.
لو ما كان بيني وبينه هالكلام، كنت راح أنشر اسم المرشح بالكامل، بس بعد كلامي وياه.. ما أدري شصار فيني
..
أدري كلامي فيه شوية سذاجة وانفعال.. بس مو بيدي
لما قلت لاخوي اني مترددة أنشر هالكلام زعل مني وقال شلون تبون تفضحون هالناس إّذا بتنحرجون من نشر أسامي؟ عاد آنا اخوي زعول وبسرعة يطنقر
.
المهم.. تعبت

ووراي شغل

في تفاصيل ثانية ما ذكرتها لأني ما أبي أقولها
وفي كلام ما قلته لأني نسيته
فنرجو من زميلات الكفاح اللي كانوا معاي بتذكيري بما سقط سهوا
وكل الشكر لكله مطقوق اللي ما قصر، ساعدنا بالتوزيع.. وعرض مساعدته لما كنا نتكلم مع عصابة القطط السوداء
.
المهم.. الليلة نتجمع عند مقر التحالف الوطني الديمقراطي بالروضة
الساعة 8:30
وصلوا الدعوة لكل اللي تعرفونه.. ولتكن لنا وقفة ضد القمع الحكومي، والا ترى بنصير مثل سوريا ومصر وأسوأ

.

ونبيها خمسة